無須十戒，只需引刀成一快

杜哥問：大家老左之後會唔會咁樣？
一晚通宵唔捱得
兩腳軟蹄唔行得
三粒藥丸唔少得
四篤夜尿唔忍得
五更醒咗唔瞓得
六種骨痛唔郁得
七種凍品唔飲得
八卦小氣唔激得
狗屎垃圾唔捨得
十分鐘後唔記得
有趣，但又真喎！！

我只係一八九十項啫，並非全部。唔知杜哥中幾多?

輝哥話佢冇樣中，不過想想下第一項就唔試得過，自認唔得。我估輝哥係極嚴重之第十項，所以以為自已冇樣中。杜哥話覺得輝哥不過十樣都幾大"唔認得"啫！

輝哥補充：
一Q清袋唔受得。
兩頭住家唔嘈得。
三個細路唔忍得。
四份兼職唔少得。
五十生仔唔要得。
六神無主唔瞓得。
七層樓梯唔上得。
八成人工唔用得。
狗臉歲月唔喊得。
 十年人事唔認得。
以上十得，唔知你又中幾多。

大家回答時要講明杜哥十項定輝哥十項。輝哥十項是但中一條都死！

輝哥話杜哥好似中一兩條喎。

杜哥回應有三個細路，要忍得佢地喎！

我補充: 呢十條我全中!
一世聰明樣樣得，
兩岸三地都去得，
三頭六臂好打得，
四肢強健又做得，
五官端正最睇得，
六舊腹肌全用得，
七律五絶詩才得，
八面玲瓏交際得，
狗友豬朋唔識得，
十全十美乜都得。

輝哥話我自吹自擂冇樣得。

杜十病，輝十憂，趙十誑。若能全免，可喜可賀。全是人生大題目。未中嘅，就唔好吡佢發生，中咗就放開D來處理。

趙十條在少年，輝十條在中年，杜十條在老年。還欠壯年十條。

我再補充 壯年十戒
 一樓一鳯唔嫖唔得
二奶小三唔包唔得
三角戀愛唔爭唔得
4仔AV唔睇唔得
五糧茅台唔飲唔得
六合波馬唔賭唔得
七情六慾唔滾唔得
八掛多事唔理唔得
狗友豬朋唔識唔得
十全大補冇偉哥唔得

請留意個戒字，唔係叫大家去做，係叫大家想做都要忍著唔好做。

輝哥話， 無須十戒，只需引刀成一快。